Тренерот на Наполи, Антонио Конте, не беше задоволен по поразот од Удинезе (0-1). Тој смета дека неговиот тим мора да ги подобри настапите на гостувањата, каде што треба да покаже повеќе карактер.
„Во првото полувреме не дозволивме ниту еден удар кон нашиот гол, можевме подобро да ги искористиме шансите што ги имавме. Имавме тешкотии на почетокот на второто полувреме и од тој момент се почувствува одреден страв. Два поништени гола и статива на почетокот на вториот дел. Бевме премногу вознемирени и премногу уплашени, моравме напорно да работиме. Мора да играме добро и во тешките моменти. Должни сме да ги контролираме ситуациите и дефинитивно мора да се подобриме. Треба подобро да се снаоѓаме во тие моменти и да ги дочекуваме со искуство. Не смееме да губиме храброст ниту да се предаваме. Ако играш на тој начин, ризикуваш да примиш гол, а ние и примивме“, изјави Конте.
„Немам ништо негативно да кажам за момчињата, кои даваат сѐ од себе во оваа вонредна ситуација. Мора подобро да ги контролираме натпреварите и да покажуваме повеќе карактер далеку од дома. На психолошко ниво се обидуваме да работиме на тоа и да го пронајдеме вистинскиот пат. Можеме да напредуваме, тука имаме одлични момчиња“, додаде тој.
Еден од најголемите проблеми на Наполи и понатаму се многубројните повреди во составот.
„На ова предупредував дури и кога победувавме. Нема што многу да се додаде. На почетокот на сезоната, кога играш во повеќе натпреварувања, се грижиш да изградиш квалитетен состав. Што можеш да направиш кога тимот е ослабен поради надворешни фактори? Оваа сезона нема да ни биде лесна. Најважно е да бидеме обединети и сплотени, да ги дочекуваме предизвиците заедно. Целиот клуб мора да биде единствен – оваа година нема да биде лесна. Сакаме да работиме и да се бориме. Загубивме седум гостински натпревари и тоа мора да го подобриме“, заклучи стратегот.
