Тренерот на Наполи, Антонио Конте, верува дека борбата за титулата во Серија А ќе почне да се разгорува пред крајот на првиот дел од сезоната и прогнозира дека пласманот во италијанскиот шампионат ќе се промени неколкупати пред крајот на сезоната 2024/25.
Тимот на Наполи е лидер на табелата во Серија А со 29 бода од 13 одиграни натпревари, но уште четири екипи – Аталанта, Интер, Фиорентина и Лацио – го следат со по 28 поени. За клубот од Неапол следува гостување кај Торино во недела, во рамки на 14. коло од шампионатот.
Конте прогнозира дека ќе има значајни промени во конкуренцијата за титулата уште пред завршувањето на календарската година.
„Треба да бидеме реални и да признаеме дека поминаа само 13 натпревари од почетокот на сезоната, а има шест тимови кои се на неколку поени зад нас. Првенството досега е навистина балансирано, но не верувам дека така ќе остане до крајот,“ изјави Конте на прес-конференција.
„Борбата ќе почне да се разгорува малку пред крајот на првиот дел од сезоната, но ние сме задоволни. Ова покажува дека работиме добро и секојдневно поставуваме важни основи. Гледам постојан развој, и тимски и индивидуално. Заслугата треба да оди кај момците кои сакаат да се подобруваат“, додаде Антонио Конте.
