Германскиот стратег Јирген Клоп е свесен дека неговиот тим Ливерпул ќе има многу тешка задача во продолжението од натпреварувањето во Премиер – лигата. Познато е дека англиските клубови не знаат за пауза во декември, а распоредот е особено густ после Божиќ. Така Ливерпул годинава ќе одигра дури девет натпревари за еден месец, а Германецот смета дека толку згуснатиот распоред е чиста лудост.
„Навикнати сме на напорен распоред. Ќе видиме што ќе се случи кон средината на декември или крајот на месецот, но полемиката околу тоа продолжува. Ова е лудило. Отсекогаш било лудило и ќе биде лудило. Во ред е додека не дојде Божиќ. Ова е традиција, разбирам се, но на крајот на декември доаѓаат тешки времиња“, изјави загрижениот Клоп.
Ливерпул во моментов е третопласиран на табелата во Премиер – лигата со заостанување од два бода во однос на првопласираниот Челси, а следниот месец може да биде клучен во борбата за титулата.
