Аутсајдерот Грузија му даде сериозен отпор на големиот фаворит Шпанија и испадна достојно при своето прво учество на големо првенство. Грузијците водеа долго време по автоголот на Робин Ле Норман, но не успеаја да го издржат шпанскиот притисок и загубија со 4-1 во осминафиналето на ЕВРО 2024.
Капитенот на Грузија, Гурам Кашија, изјави дека е горд на претставувањето на тимот.
„Тоа беше неверојатна авантура за нас. Ние сме исклучително горди на она што го постигнавме. Не го постигнавме резултатот што го посакувавме, но на крајот сме многу задоволни од начинот на кој ја претставивме нашата земја на нашиот прв голем турнир“, изјави Кашија.
„Следната генерација доаѓа, треба да продолжиме да се подобруваме. Тимот се претвори во семејство и ќе си недостасуваме еден на друг сега кога си заминуваме. Но, ние ќе се вратиме посилни и ќе донесеме повеќе успеси за нашата земја“, дополни грузискиот репрезентативец.
