Младата ѕвезда на Барселона, Ламин Јамал, беше еден од хероите на Каталонците во победата со 2-0 против Атлетик Билбао во првото полуфинале од Суперкупот на Шпанија. Тој го постигна вториот гол за Барса, со кој практично ги реши дилемите околу исходот на натпреварот.
„Атлетик е физички силен тим и се најдовме во потешкотии на крајот од првото полувреме, но продолживме да играме добро и успеавме да ги совладаме“, изјави Јамал по натпреварот.
За време на натпреварот пристигна и веста дека Дани Олмо ќе може да се врати во тимот на Барселона, на што Јамал реагираше позитивно.
„Среќни сме што Дани Олмо и Паул Виктор сега можат да играат. Тие се чувствуваат добро“, продолжи крилниот играч.
17-годишниот талент е само на еден натпревар од освојувањето на својот прв трофеј со Барселона, откако пред неколку месеци со репрезентацијата на Шпанија го подигна пехарот на ЕВРО 2024.
„Возбуден сум и гледам со нетрпение кон освојувањето на мојот прв трофеј со Барселона“, истакна Јамал.
