Инциденти го одбележаа Белград пред вечерашниот натпревар од Лигата на шампионите помеѓу Црвена ѕвезда и Штутгарт. Навивачите на Црвена ѕвезда, познати како „Делии“, нападнаа поддржувачи на Штутгарт кои пристигнале во српската престолнина за да го бодрат својот тим.
Според српскиот медиум „Телеграф“, инцидентот се случил во центарот на Белград, на Зелен венец, каде група навивачи на германскиот клуб престојувале во кафулиња. Настанот ескалирал во физичка пресметка, во која еден навивач на Штутгарт добил сериозни повреди.
На социјалните мрежи се појавија видеа од инцидентот, а очевидци истакнаа дека нападнатите зборувале на турски и германски јазик. Навивачите на Штутгарт биле претходно предупредени за можноста од вакви ситуации, со оглед на репутацијата на домашната навивачка група, која е позната по насилство и поврзаност со криминални активности.
