Поранешниот македонски селектор Игор Ангеловски ја заврши авантурата во казахстанскиот Каспиј. Тој на прес – конференција објави дека заминува од клубот.
„Напорно работев за да го стекнам своето име и сега не сакам да го изгубам тоа име. Решив да го напуштам своето работно место. Оваа порака им ја пренесов на играчите и управата. Се надевам дека ќе се создадат услови за следниот тренер. Верувам дека фудбалскиот клуб Каспи ќе остане во Премиер – лигата на Казахстан. Би сакал да им се заблагодарам и да посакам успех на сите што работат во фудбалскиот клуб. Особено сум им благодарен на навивачите“, изјави Игор Ангеловски.
Очигледно е дека во Каспиј многу работи не функционирале според претходно договорените детали.
„Најпрво би сакал да им се заблагодарам на играчите кои вчера излегоа на теренот, немам што да им кажам, а благодарен сум и на момците од резервниот тим, бидејќи половина од нив се млади играчи на нашата академија. Кога пристигнавме овде пред два месеци, бевме на последното место со нула бодови и ни рекоа дека мораме да ги прилагодиме играчите во тимот и да пуштиме многу од нив. Се договоривме дека ќе добиеме нови играчи кои ќе ги заменат. На 12 играчи им ги раскинавме договорите, меѓу нив и на тројца играчи кои сакавме да ги задржиме, но не можевме, Дијакате, Бриџидо и на Џигаури. Две недели трениравме за дуелот против Жетису со 10 играчи од главниот тим, а останатите со млади играчи од академијата“, објави Ангеловски.
