Кристијано Роналдо в недела ќе го пропушти натпреварот на португалската репрезентација против Швајцарија во Лигата на нации. Капитенот Роналдо, Жоао Мутињо и Рафаел Гереиро не отпатуваа со селекцијата на натпреварот во Женева.
Португалскиот селектор Фернандо Сантош му даде пауза на напаѓачот на Манчестер Јунајтед.
„Тие немаат повреди и физички проблеми, тоа е само нормална ротација. Немаше смисла да се патува со 26 играчи во Швајцарија, бидејќи само 23 можат да бидат во тимот“, изјави Сантош.
И без Роналдо, играчот од средниот ред Рубен Невеш не се сомнева дека Португалија има доволно квалитет за победа.
„Очигледно Кристијано е најдобриот играч на светот и секогаш е задоволство да се игра со него. Сепак, сигурен сум дека сме подготвени да освоиме нови три бода“, истакна играчот на Вулверхемптон.
