Марeк Хамшик долги години беше капитен на Наполи и на словачката репрезентација. Минатата година престана активно да игра фудбал, а веднаш се зафати со тренерската работа па сега е на Европското првенство како помошник на словачкиот селектор Франческо Калцони.
Хамшик за време на својата играчка кариера беше познат по својата препознатлива фризура, но со завршувањето на кариерата дојде и крајот на таквиот имиџ.
Во разговор со новинарите пред неделниот натпревар од осминафиналето на ЕВРО 2024 меѓу Словачка и Англија откри дека поради тоа луѓето често не го препознаваат.
„Има моменти кога луѓето не ме препознаваат. Пред неколку дена шетав и налетав на група Македонци кои сакаа да се фотографираат, но сакаа јас да ги фотографирам нив. Ги фотографирав и им реков дека го познавам нивниот поранешен капитен Горан Пандев, но не ми веруваа. Потоа отидоа на Google и на крајот сепак сфатија кој сум, па се фотографиравме заедно,“ раскажа Хамшик и ги насмеа новинарите.
