Манчестер Сити вечерва (21 часот) гостува на „Паркот на принцовите“ во првиот полуфинален натпревар од Лигата на шампионите. Менаџерот на англискиот тим Пеп Гвардиола сака да го освои трофејот во ЛШ и со „граѓаните“ и вели дека ПСЖ е одличен тим, но навикнат е да игра против тимови кои се бранат 90 минути на натпреварите. Против Манчестер Сити, тоа нема да биде така.
„ПСЖ е тим кој е навикнат да игра против екипи кои се бранат во текот на сите 90 минути. Со нас ќе биде сосема поинаку. Знам и дека имаат неверојатно офанзивно оружје, но нема да го минам целото полуфинале во страв дали ќе погодат Мбапе, Нејмар или останатите. Ние не сме добри кога се браниме, сакаме да ја имаме топката во нозе и нема да отстапиме од нашиот стил на игра. Мораме и многу да трчаме, затоа што ПСЖ е силен на тој план. Го победи Баерн Минхен иако германскиот тим имаше речиси 50 шутеви кон голот“, изјави Пеп Гвардиола.
Англискиот тим нема проблеми со повредени фудбалери, а Маурисио Покетино ќе го нема на располагање Хуан Бернат.
