Германскиот репрезентативец Илкај Гундоган ги нападна играчите од одбраната по елиминацијата од Светското првенство во Катар. Според него, Германија премногу лесно прима голови и тоа на крајот е пресуден фактор за резултатите.
„Прелесно примаме голови, многу лесно ја губиме топката во средината и исто толку лесно пропуштаме шанси за гол. Секако дека сме Германија и мораме да имаме големи аспирации на турнирите. Затоа е добро да се погледнеме во очи. За мене на овој Мундијал едноставно не го дадовме максимумот како тим и веројатно и индивидуално. Треба да се запрашаме кои се причините, секој од нас да се погледне во огледало и да признае дека тоа не беше доволно“, прокоментира Гундоган.
Германците освоија четири бода, исто колку и Шпанија, но отпаднаа поради послаба гол-разлика. Првото место во групата и припадна на Јапонија, која ги победи и Германците и Шпанците.
