Евертон и Ливерпул одиграа драматично градско дерби на „Гудисон Парк“, кое заврши без победник (2-2), со гол во последните секунди и ВАР-драма. Ова воедно беше и последното Мерсисајдско дерби на легендарниот стадион.
Евертон поведе рано во натпреварот преку Бето во 11. минута, но Ливерпул брзо израмни со голот на Алексис Мекалистер само пет минути подоцна. „Црвените“ ја презедоа контролата во второто полувреме и во 73. минута поведоа со погодок на Мохамед Салах.
Сепак, Евертон не се предаде и во 98. минута Џејмс Тарковски погоди за израмнување, што предизвика хаос на теренот. По голот следеше ВАР-проверка, а на крајот и тензична атмосфера со турканици меѓу играчите.
Ливерпул сега има седум бода предност на врвот на табелата пред Арсенал, кој е второпласиран.
