Тренерот на Аталанта, Џанпјеро Гасперини, го прокоментира поразот од 2-3 против Реал Мадрид на домашен терен во Лигата на шампионите.
„Секако, сега сме разочарани, но од вакви дуели можеме многу да научиме. Ни недостигаат ситни детали, но игравме храбро против еден голем тим. Загубивме, но не заостанувавме во играта, што ќе ни помогне да направиме уште еден мал чекор напред“, изјави тренерот на Аталанта.
Искусниот стратег смета дека ваквите порази му помагаат на тимот да се развива.
„Покажавме многу добри работи. Тоа не мотивира да продолжиме да се развиваме. Во некои моменти малку побавно ја пренесувавме топката во половината на противникот, па Реал Мадрид брзо се поставуваше во одбрана. Жал ми е што нашата долга серија на победи заврши. Знаевме дека можеме да израмниме. Да, тажни сме што не успеавме, но беше вистински фудбалски празник, што е една од нашите главни цели“, додаде Гасперини.
