Ханси Флик оствари фантастични резултати со Баерн Минхен, ги освои титулите во Бундес-лигата, Лигата на шампионите и на Светското клупско првенство, но е разочаран од статусот што го има во клубот. Најавил кај раководството на Баерн Минхен дека очекува многу поголем респект и влијание околу изборот на нови засилувања.
Во Баерн Минхен има жестока „војна“ на релација Салихамиџиќ – Флик. Спортскиот директор ги носи новите засилувања, а веројатно и нема соодветна комуникација со тренерт Ханси Флик. Тие имале и жестока расправија, па на крајот од сезоната ќе мора и еден да си замине. Неодамна се случила и кавга во клупскиот автобус.
„Не сум горд на една реченица што му ја кажав. Разговаравме после тоа, си подадовме рака и рековме дека треба работите да ги насочиме во вистински правец. Но, тоа треба да се прави и во пракса секојдневно, не само со празни зборови. Кога ќе направите нешто лошо, се извинувате и одите понатаму“, изјави Ханси Флик.
Баерн Минхен вечерва го игра првиот натпревар од четвртфиналето во Лигата на шампионите против Пари Сен Жермен.
