Меѓународната фудбалска федерација (ФИФА) денес ѝ се извини на Фудбалската федерација на Украина поради прикажувањето на картата на таа земја без Крим, територија која е окупирана од Русија, за време на извлекувањето за квалификациите за Светското првенство 2026 година.
„Целосно ја разбираме чувствителноста на ова прашање и иако инцидентот беше ненамерен, искрено жалиме“, напиша шефот на асоцијацијата на членките на ФИФА, Елхан Мамадов, во писмо кое го објави Фудбалската федерација на Украина.
Украина беше една од 54-те репрезентации вклучени во извлекувањето во петокот во Цирих за европските квалификациски групи за Светското првенство 2026 година.
Крим, полуостровот кој Русија незаконски го окупираше во 2014 година, не беше обоен како дел од украинската територија во графичкото пренесување за време на извлекувањето во седиштето на ФИФА.
„ФИФА, дали сте добро?“, напиша портпаролот на украинската влада Георгиј Тихи по извлекувањето, на социјалната мрежа X и додаде: „Очекуваме јавно извинување.“
Мамадов наведе дека картата била обезбедена од надворешен соработник и дека ФИФА разгледува како да се „осигури дека ваквите пропусти нема да се повторат во иднина“.
Поради агресијата врз Украина во февруари 2022 година, ФИФА ѝ забрани на Русија учество во меѓународни натпреварувања.
