Податоците од сензорот поставен во топката потврдија дека португалскиот капитен Кристијано Роналдо не бил стрелец на првиот гол на натпреварот против Уругвај, објави денеска „ЕСПН“. Ова за американската телевизија го потврдија Меѓународната фудбалска федерација (ФИФА) и производителот на топки „Адидас“.
„Дефинитивно можеме да потврдиме дека немаше контакт со топката од страна на Кристијано Роналдо за водечкиот гол на натпреварот“, се вели во соопштението.
Фудбалерите на Португалија се пласираа во осминафиналето на Светското првенство, откако во второто коло од групата Х го победија Уругвај со 2-0.
Водечкиот гол на натпреварот го постигна Португалија во 54. минута, кога Бруно Фернандеш ја испрати топката кон голот, но во првиот момент се чинеше дека Роналдо ја удри топката во скок. Сепак, проверките покажаа дека Бруно Фернандеш е стрелецот. Тој го постигна и вториот гол од пенал, во завршницата од мечот.
