Пауло Дибала направи нешто што поголемиот дел од фудбалерите не би го направиле. Одби најмалку 75 милиони евра, сума која би ја добил за три години од саудискиот клуб Ал-Кадсија, за да остане во Рома за 11 милиони евра бруто до крајот на сезоната. Но, овој износ во Италија би го добил вкупно, со платата и максималните бонуси, намалени за данок.
Од друга страна, во Саудиска Арабија му понудија 25 милиони евра годишно само како плата, без премии и бонуси.
„Сензационално. Дибала рече „не“ на понудените и договорените 75 милиони евра од Саудиска Арабија. Ова го објави на социјалните мрежи: „Благодарам Рома, се гледаме во недела“, пишува „Газета дело Спорт“ и ги открива деталите од неверојатниот пресврт.
„Дибала првично ја прифати фантастичната понуда од саудискиот клуб, по што следуваа преговорите меѓу Ал-Кадсија и Рома. Саудијците им понудија на Италијанците компензација од 3 милиони евра и бонуси. Тоа е далеку помалку од 12 милиони, колку што беше клаузулата во договорот на Дибала до крајот на минатиот месец. Но, Рома сепак одлучи да го пушти, бидејќи го доведоа пред две години без компензација, договорот му истекува следното лето, и што е најважно, Дибала сакаше да замине. Сепак, на крајот се случи неочекуван пресврт“, истакна италијанскиот медиум.
Фановите на Рома синоќа дојдоа пред куќата на Дибала да го слават и да му се заблагодарат затоа што одбра да остане и ги одби милионите од Саудиска Арабија.
