Селекторот на француската репрезентација Дидие Дешамп на прес-конференција разговараше за Пол Погба. Ѕвездата на Јувентус се соочува со суспензија од две до четири години доколку истрагата покаже дека е виновен откако неговиот допинг тест бил позитивен и Б примерокот покажал прекумерно ниво на „тестостерон“.
„Жал ми е за Погба, многу работи му се случија. Тој е во компликувана ситуација. Ќе мора да се брани, тоа е дел од една долга процедура. Се започна со допинг тестот. Не знам што ќе му се случи, но тажно е тоа што се случува“, изјави Дешамп.
Погба има 91 настап и 11 голови за Франција, со која го освои Светското првенство во 2018 година и Лигата на нации во 2021 година.
Дешамп доби прашање и дали го гледа Погба во иднина во репрезентацијата.
„Не знам што ќе се случи со него во иднина. Се надевам дека повторно ќе биде среќен и повторно ќе излезе на теренот, но ќе треба малку време“, одговори селекторот, чии играчи ги очекуваат натпреварите со Холандија ( 13 октомври) и со Шкотска (17 октомври) во квалификациската група Б за Европското првенство.
