Македонскиот фудбалски репрезентативец Дарко Чурлинов преку социјалните мрежи се збогуваше со Јагиелонија, каде што ја мина сезоната како позајмен играч од англискиот Барнли.
Чурлинов одигра одлична сезона во дресот на полскиот клуб, која ќе остане запаметена како една од најуспешните во историјата на Јагелонија. Тимот предводен од македонскиот офанзивец стигна до четвртфинале во Конференциската лига, што е најголем европски успех на клубот, а се закити и со трофејот во полскиот Суперкуп.
„Ти благодарам Јагиелонија за сезоната“, напиша Чурлинов во кратката, но емотивна порака на своите социјални мрежи.
Иако сѐ уште е играч на Барнли, останува неизвесно каде ќе ја продолжи кариерата во наредната сезона, особено по импресивните настапи во Полска.
