Челси се обидува да го ангажира крилото на Штутгарт, Кристијан Фурих. 26-годишниот играч има одлична сезона со тимот на „швабите“, па дури обезбеди место и во германската репрезентација. Ова не остана незабележано од лондончани, кои сакаат да ја победат конкуренцијата за неговиот потпис.
Според „Кикер“, клубот од „Стемфорд бриџ“ веќе стапил во контакт со газдите на германскиот клуб, па дури и дал и прва понуда за Фурих, вредна 30 милиони евра. Засега од Штутгарт сѐ уште немаат дадено одговор дали ја прифаќаат.
Фирих неодамна повторно потпиша нов договор со Штутгарт до 2028 година и клубот е во силна позиција во преговорите околу неговиот трансфер. Сигурно ќе се обидат да извлечат што повеќе доколку воопшто се согласат да се разделат со некоја од нивните ѕвезди пред претстојниот настап во Лигата на шампионите.
Фурих оваа сезона има девет гола и седум асистенции на 37 натпревари во сите натпреварувања. Покрај Челси, за него се заинтересирани и Баер Леверкузен, Борусија Дортмунд и Лајпциг.
