Барселона официјално потврди дека следното домашно коло во Ла Лига против Хетафе, кое ќе се одигра во недела, повторно ќе се игра на стадионот „Јохан Кројф“ во клупската база. Токму таму беше одигран и мечот со Валенсија изминатиот викенд.
Од клубот нагласуваат дека продолжуваат интензивно да работат на обезбедување на сите неопходни административни дозволи за што поскоро враќање на „Спотифај Камп Ноу“.
Проблемите околу „Камп Ноу“ продолжуваат, а во клубот дури размислуваат и за можноста целосно да се вратат на „Монжуик“.
Сепак, надежите на раководството се поврзани со враќање на сопствениот стадион на 28 септември во дуелот против Реал Сосиедад. Тоа е поставената цел, бидејќи овој меч ќе им овозможи на експертите на УЕФА да го проценат стадионот со одигрување на барем еден натпревар пред да дадат евентуална дозвола каталонците да бидат домаќини во Лигата на шампионите.
Првиот домашен меч во ЛШ за Барса е закажан на 1 октомври против Пари Сен Жермен.
