Баерн Минхен ја победи Барселона со 2-0 на „Алијанц арена“ и со тоа му го нанесе првиот пораз на каталонскиот клуб во натпреварувањето оваа сезона. Тренерот на Барселона, Чави Хернандез, во својата анализа на натпреварот истакна дека е лут, но и горд.
„Бевме подобри од Баерн во многу аспекти од играта. Изгледавме подобро физички и доминиравме во играта во првото полувреме. Ако мене ме прашувате, требаше да победиме. Имавме седум многу веројатни ситуации за гол, од нив мораше да постигнеме голови“, изјави тој во воведот на анализата на натпреварот.
„Лут сум, но и горд. Бевме израмнети. Нема да кажам дека бевме подобри, но, сепак, тие дојдоа до победа. Првиот гол го примивме по корнер, а вториот затоа што не го спречивме контранападот. Тоа не треба да се случи. Тие се комплетен тим, но ова е почеток и ќе мора да ги подобриме тие аспекти од нашата игра. Бевме одлични во првото полувреме, ги имавме, доминиравме, ги освојувавме дуелите. Заслуживме да победиме“, изјави Чави.
Баерн победи со голови во вториот дел. Лукас Хернандез погоди за 1-0 во 51. минута, кога прецизниот центаршут на Кимих од корнер го претвори во гол. Само три минути подоцна домашните фудбалери одиграа брза акција за 2-0. Мусијала му ја додаде топката на Сане, кој ги мина дефанзивците на Барселона и со мирна завршница го зголеми водството, а Баварците без проблем го задржаа до крајот на натпреварот.
