Македонскиот шампион Шкендија оствари значајна победа, совладувајќи ја романската ФЦСБ со 1-0 на домашен терен и сега со големи надежи патува на реванш во Букурешт, каде ќе се обиде да испише историја. Ниту еден клуб од Македонија досега не успеал да се пласира во третото коло од квалификациите за Лигата на шампионите во актуелниот формат, а пласманот таму би значел обезбедено европско лето.
Тетовци одиграа одличен натпревар и заслужено славеа пред околу 7.000 навивачи на Националната арена „Тодор Проески“ во Скопје. По натпреварот, своето мислење го сподели тренерот на тимот, Јетон Беќири.
„Горд сум на момците за нивната пожртвуваност и дисциплина. Имавме моменти кога покажавме преголема респект кон противникот и направивме две грешки кои можеа да нè чинат, но севкупно задоволен сум од борбеноста. ФЦСБ е квалитетна екипа. Ова беше само првиот натпревар, тие сè уште се фаворити. Ние мора да останеме скромни, да ја анализираме играта и во Букурешт да дадеме сè од себе. Гостинскиот натпревар ќе биде предизвик, но не се откажуваме. Фаворитската улога им ја препуштаме на Романците, а ние ќе се обидеме да изненадиме со борбеност и добра енергија. Ако ги искористиме нашите шанси, зошто да не постигнеме историски успех?“, изјави Беќири.
Реваншот ќе се одигра на 30 јуни во Букурешт, а победникот од двомечот ќе се сретне со подобриот од дуелот меѓу Шамрок Роверс (Ирска) и Карабах (Азербејџан) во следната рунда.
