Барселона подготвува нов договор за Рафиња, кој ќе вклучува откупна клаузула значително пониска од очекуваната, иако Бразилецот оваа сезона се етаблира како еден од најдобрите фудбалери во светот.
Според информациите на „Спорт“, каталонскиот клуб е во почетна фаза на преговори со 27-годишниот репрезентативец на Бразил, кој под водство на Ханси Флик стана клучна фигура во тимот. И покрај неговата одлична форма, клубот планира да вклучи откупна клаузула од само 80 милиони евра, сума која може да предизвика шпекулации за можен трансфер во иднина.
Барса нуди продолжување на договорот по шема 1+1 година, бидејќи раководството е внимателно кон долгорочни договори кои претходно сериозно го оптоварија буџетот. Фудбалерот, пак, инсистира на загарантирани две години. Постојат и разлики околу платата, бидејќи агентите на Рафиња бараат подобри финансиски услови. Сепак, разговорите започнале во позитивен дух, со цел да се избегнат тензии во иднина.
Додека Барселона се обидува да го задржи својот офанзивец, од Саудиска Арабија веќе демнат со понуда. Ал-Хилал подготвува офанзива вредна 100 милиони евра и четиригодишен договор со вкупна плата од 200 милиони евра.
Оваа сезона Рафиња е во извонредна форма, со 30 голови и 23 асистенции на 49 натпревари во сите натпреварувања. Утре ќе има шанса да го зголеми својот ефект во финалето на Купот на Кралот против Реал Мадрид.
