Баерн Минхен гостува во Копенхаген во натпревар од групата А во Лигата на шампионите. Баварците на мечот на „Паркен“ ќе бркаат уште еден рекорд на турнирот.
Германскиот гигант е во рекордна серија од 35 натпревари без пораз во групната фаза (32 победи и 3 нерешени). Тимот има врвна серија од 14 последовни победи во ова натпреварување, што беше постигната со успехот од 4-3 над Манчестер Јунајтед.
Баерн денеска во Данска може да постави уште еден рекорд. Тимот на Томас Тухел се стреми кон 18. последовно гостување во групната фаза без пораз.
Во моментов Баварците се на врвот на ова рангирање и го делат првото место со Барселона со 17 последовни гостувања без пораз.
Баерн Минхен шест години нема пораз на гостински терен во Лигата на шампионите. Тимот последен пат беше поразен на гостински терен во септември 2017 година со 0-1 од ПСЖ.
