Фудбалската федерација на Азербејџан официјално соопшти дека се разделува со селекторот Фернандо Сантош. Искусниот 70-годишен Португалец, кој со својата татковина беше европски првак во 2016 година, ја презеде репрезентацијата минатото лето, но резултатите беа разочарувачки – на 11 натпревари не успеа да запише ниту една победа.
Азерите лошо ги започнаа светските квалификации, а последниот удар беше убедливиот пораз од 0-5 на гостувањето кај Исланд. Дополнителен проблем за нив е што во групата играат и силните Франција и Украина.
Ова е уште еден тренерски неуспех за Сантош во последните години, откако претходно беше отпуштен како селектор на Полска, а потоа и од клупата на Бешикташ. За претстојниот меч со Украина, селекцијата ќе ја предводи тренерот на У21 тимот, Ајхан Абасов.
Проблеми има и уште една репрезентација од УЕФА, Казахстан, кој се наоѓа во група заедно со Македонија. Селекцијата доживеа тежок пораз од 0-6 против Белгија, по што селекторот Али Алиев поднесе оставка.
„Јас ја преземам целата одговорност за поразот. Вината е моја и ќе поднесам оставка“, изјави Алиев на прес-конференцијата во Белгија.
По пет кола, Казахстан има три бода и се наоѓа на четвртото место во групата, каде се и Белгија, Велс, Македонија и Лихтенштајн. Алиев ја презеде селекцијата во јануари, веднаш по заминувањето на Станислав Черчесов.
Ова значи дека Казахстан со нов селектор ќе допатува на дуелот против Македонија во Скопје.
