Нови лоши вести од таборот на Арсенал. Такехиро Томијасу ќе биде надвор од терените подолго време откако беше подложен на операција на десното колено. Според британските медиуми, јапонскиот дефанзивец веројатно нема да игра до крајот на сезоната.
„Пред неколку дена бев на операција на коленото и веќе започнав со рехабилитација за да се вратам на тоа што најмногу го сакам. Ова е најтешкиот период во мојата кариера, но нема да се откажам“, напиша 26-годишниот Томијасу на Инстаграм.
Ова е трет сериозен удар за „топчиите“ во последниот месец, по операциите на Каи Хаверц и Габриел Жесус. Јапонскиот репрезентативец, кој пристигна во Арсенал од Болоња во 2021 година, одигра 30 натпревари минатата сезона, но оваа сезона имаше ограничено време на теренот поради повредите.
Арсенал моментално заостанува седум бода зад лидерот Ливерпул во Премиер – лигата и во сабота ќе игра против Вест Хем.
