Капитенот на Англија, Хари Кејн, откри дека националниот тим имал средба пред квалификацискиот дуел во Белград, на која се разговарало за реакцијата во случај на расистички инциденти на трибините. Кејн нагласи дека тимот е подготвен да го следи протоколот на УЕФА доколку тоа се случи, пренесува „ЕСПН“.
Фудбалската асоцијација на Србија веќе апелираше до навивачите за коректно однесување. Во последните пет години земјата била казнувана со повеќе од 700.000 евра поради различни облици на дискриминација и навреди од трибините. За претстојниот меч, 15% од стадион „Рајко Митиќ“ ќе останат затворени.
„Имавме средба и разгледавме како ќе постапуваме според протоколите на УЕФА. Не сакаме премногу да се фокусираме на тоа, туку на самиот меч и на победата против Србија. Сè може да се случи, но подготвени сме“, изјави Кејн.
Протоколот на УЕФА предвидува три нивоа на реакција при дискриминација – прво предупредување и прекин на играта, потоа времено прекинување, а ако инцидентите продолжат – целосно прекинување на натпреварот.
Селекторот Томас Тухел исто така коментираше:
„Знаеме како функционираат протоколите, но верувам дека ќе гледаме квалитетен фудбал и сè ќе биде во духот на почитта. Не сакам да давам премногу акцент на тоа, туку да се фокусираме на убавината на играта.“
Англија доаѓа во Белград со извесна напрегнатост по скромната победа над Андора (2-0), но добрата вест е дека Марк Гехи е целосно здрав и Тухел ќе може да смета на сите играчи за битката за првото место во групата K.
