Тренерот на Реал Мадрид, Карло Анчелоти, мирно го прифати убедливиот пораз од Манчестер Сити со кој „кралевите“ ја загубија европската круна освоена лани. Англискиот тим славеше со 4-0, а италијанскиот стратег призна дека ривалот бил подобар и дека заслужено се пласира во финалето на Лигата на шампионите.
„Игравме против тим што беше подобар од нас, ни создаде многу проблеми со високиот пресинг и победи заслужено. Не е трагедија да загубиш фудбалски меч, многу полоши работи може да ти се случат, во спортот и во секојдневниот живот. Не е ништо срамно да се загуби полуфинале во Лигата на шампионите, дури и со овој резултат. Немаше пад на моите фудбалери на психолошки план, туку едноставно ривалот беше подобар на теренот и нѐ надигра и спортски е тоа да се признае“, изјави Анчелоти.
Манчестер Сити во финалето на ЛШ во Истанбул ќе игра против Интер на 10 јуни.
