На Јувентус со одлука на судот му се одземени дури 15 бода поради финансиски малверзации во клубот. Тој е казнет за фалсификување финансиски извештаи, односно прикажување лажни профити на клубот, како и за малверзации со плати за време на пандемијата. Поради казната „старата дама“ падна на 10. место со 22 бода.
Тренерот Масимилијано Алегри ја коментираше ситуацијата во клубот по драстичната казна.
„Ништо не се менува. Треба уште да освојуваме бодови. Мораме да се обидеме да ја победиме Аталанта бидејќи победата ни го носи седмото место во поредокот. Имаме натпревари во Лига Европа, во Купот… Мора да играме најдобро што можеме. Следната недела ќе ги имаме Пол Погба и Душан Влаховиќ кои се враќаат, а сега повторно сметаме на Хуан Квадрадо. Пред оваа пресуда имавме 37 бода и шанса да играме во Лигата на шампионите, а можеби и да ја освоиме титулата. Мораме да го направиме тоа што треба, конечната одлука ќе биде донесена за два месеци и не смееме да си дозволиме тогаш да тагуваме затоа што не сме одиграле максимално“, изјави Алегри.
Тој доби прашање и дали ќе го напушти клубот доколку Јувентус не се пласира во Европа.
„Јас сум тренер на Јувентус и ќе останам, освен ако не добијам отказ. Има моменти во кои треба да покажеме одговорност, кога е тешко, мора да бидеме мажи. Мораме да направиме што можеме, да бидеме тивки и да се справиме со овој предизвик.цСигурен сум дека момците ќе дадат максимум“, заклучи тој.
