Македонскиот репрезентативец Аријан Адеми ќе го памети настапот на Европското првенство додека е жив. Среќен е и горд на учеството на Македонија, благодарен на поддршката од македонските навивачи кои направија неверојатна атмосфера во Букурешт.
„Горд сум што играв со Македонија на Европското првенство. Среќен сум, но малку и тажен затоа што мислам дека можевме да направиме и нешто повеќе резултатски. Но, го плативме данокот на неискуството, не се снајдовме најдобро, а во некои моменти ни фалеше и среќа“, вели Адеми.
Тој ги издвои моментите за паметење од ЕВРО.
„Европското првенство ќе го паметам најмногу по првиот меч со Австрија. По таа неверојатната атмосфера што нашите навивачи ја направија на стадионот. Навивачите ни беа ветер во грб, не само на тој меч, туку во текот на целиот наш настап. Ќе го паметам Европското и по простувањето на Горан Пандев, кој толку многу даде за македонската репрезентација, а ние му направивме шпалир против Холандија и беше прекрасна сцена“, раскажа Адеми за хрватските медиуми.
