Фудбалската репрезентација на Македонија составена од фудбалери од домашното првенство и неколкумина интернационалци денеска (14 часот) на комплексот на ФФМ ќе одигра пријателски натпревар против македонскиот прволигаш Работнички. Ќе биде тоа завршен дел од мини – кампот што го организираше селекторот Игор Ангеловски за да има детален увид во формата и на фудбалерите од македонското првенство.
„На тренинг кампот повикавме 20 фудбалери. Најголемиот дел доаѓаат од клубовите од домашниот шампионат, а неколкумина од странство. Клубовите добија дозвола од ФИФА да ги задржат своите фудбалери во мартовскиот термин за репрезентативни натпревари, а тоа значи дека изборот на фудбалери ни е значително скратен, освен се разбира за оние кои ќе добијат дозвола од своите клубови. Нашата намера е евентуално да го дополниме главниот репрезентативен список со имиња на фудбалери кои ќе остават силен впечаток на тренинг кампот и на контролниот натпревар против Работнички. Се надевам дека овој тренинг камп ќе биде од корист за сите“, изјави селекторот Игор Ангеловски.
