Финалето на Лигата на шампионите меѓу Борусија Дортмунд и Реал Мадрид, кое ќе се одигра на 1 јуни на „Вембли“, ќе го суди Словенецот Славко Винчиќ, соопшти УЕФА.
Комплетниот судиски состав за финалето ќе биде од Словенија, па на 44-годишниот Винчиќ на теренот ќе му помагаат Томаж Кланчник и Андраж Ковачиќ, додека во ВАР ќе бидат Нејц Кајтазовиќ и Раде Обреновиќ.
За Винчиќ ова ќе биде второ европско финале што ќе го суди, пред две години беше судија на финалето на Лига Европа во кое Ајнтрахт Франкфурт го победи Глазгов Ренџерс.
УЕФА ги избра судиите и за преостанатите две финалиња на европските купови.
Натпреварот од Лига Европа меѓу Баер Леверкузен и Аталанта на 22 мај во Даблин ќе го води Романецот Иштван Ковач, а финалето на Конференциската лига меѓу Олимпијакос и Фиорентина на 29 мај во Атина му e доверено на Португалецот Артуро Соареш Дијаш.
