Шкендија беше во добитна позиција против Гостивар, имаше водство од 2-0, но во финишот дозволи со два гола од пенал гостите да стигнат до 2-2. За тетовскиот тим тоа беше неочекуван удар во трката за шампионската титула, посебно што претходно веќе го „видоа“ триумфот.
Шефот на стручниот штаб, Јетон Беќири, очекувано е разочаран по вчерашното реми, но ја прифати одговорноста и им се извини на навивачите.
„Тешкo е да се коментира еден ваков натпревар, бевме многу блиску до победа, но на крајот излезе дека останавме многу далеку. Сакам да им се заблагодарам на навивачите и да им се извинам. Овој резултат за нас е еднаков на пораз и јас ја преземам одговорноста за ремито. Мислевме дека ја имаме играта под наша контрола, но невниманието во завршницата нѐ чинеше два многу важни бода“, изјави Јетон Беќири.
Сепак, Шкендија веќе гледа кон следниот натпревар, дуелот со Вардар.
„Ќе работиме напорно на тренинзите, ќе ги анализираме грешките, имаме една недела да се подготвиме за следниот натпревар против Вардар. Сѐ уште ништо не е готово, има уште многу да се игра во првенството“, дополни тренерот на Шкендија.
