Навивач на францускиот првак Пари Сен Жермен е избоден со нож од ултрасите на Милан во понеделникот вечерта во Милано. „Росонерите“ денеска го пречекуваат францускиот шампион на „Сан Сиро“ во пресметка од Лигата на шампионите.
Според очевидци, дошло до судир на околу 50 навивачи на Милан и група симпатизери на ПСЖ, по што неименуван 34-годишен француски државјанин се здобил со две убодни рани во ногата.
„Кориере села сера“ јавува дека животот на жртвата не е во опасност. Пред неполни два месеци, навивач на Њукасл исто така беше избоден во Милано пред уште еден натпревар од Лигата на шампионите.
Атмосферата на „Сан Сиро“ се очекува денеска дополнително да ја вжешти присуството на поранешниот голман на Милан, Џанлуиџи Донарума, кој сега брани за тимот на ПСЖ.
Милан е на дното во својата група откако не успеа да постигне гол во првите три натпревари и вечерва мора да победи доколку сака да се надева на прогрес.
