Напаѓачот на ПСВ Ајндховен, Малик Тилман, ја пропушти победата на неговиот тим од 4-0 против Алмере Сити во холандската лига, откако се успал. 21-годишниот американски интернационалец, кој игра како позајмен на „Филипс арена“ од Баерн Минхен, не го слушнал алармот, поради што не се појавил на заминувањето на тимот во Алмере.
Откако се дозна дека ПСВ замина без него, Тилман стапил во контакт со стручниот штаб и побарал да им се придружи на соиграчите, но не му било дозволено.
Тренерот на ПСВ, Питер Бош, го коментираше инцидентот, навестувајќи дека го планирал својот стартен состав со Тилман.
„Се успал, па го оставивме дома. Сакаше да дојде, но повеќе не беше потребно. Утре ќе се пријави на тренинг“, изјави Питер Бош.
ПСВ немаше проблеми без американскиот напаѓач и стигна до успех со головите на Гус Тил, Ирвинг Лозано, Џои Ферман и Рикардо Пепи.
Малик Тилман од почетокот на сезоната има четири натпревари и еден гол за ПСВ во сите натпреварувања.
