Македонскиот репрезентативец Стефан Ристовски се враќа во Хрватска, но овојпат во најголемиот хрватски клуб Динамо Загреб. Тој беше член на Ријека во минатото, а сега ќе го носи дресот на „модрите“.
На последниот ден од преодниот рок, Стефан Ристовски ја прифати понудата на Динамо Загреб. Тој имаше покана лично од Здравко Мамиќ да го засили Динамо Загреб и да му се придружи на репрезентативниот колега Аријан Адеми. Конечно завршува неговата сага и неиграњето во Спортинг Лисабон. Поради одлука на тренерот тој беше префрлен во Б-тимот на португалскиот клуб.
Динамо Загреб комплетно ќе го откупи Стефан Ристовски, неофицијално, трансферот изнесува 1,5 милиони евра, а Спортинг Лисабон ќе добие и процент од идниот трансфер на македонскиот репрезентативец. Претходно, Спортинг Лисабон за продажба на Стефан Ристовски бараше отштета од 2,5 милиони евра.
