Горан Пандев е „гранде“. Го знаат тоа Италијанците одамна, затоа и му го дадоа веќе легендарниот прекар. Но, сите се во чудо затоа пто Горан е и вечен. Цели две децении игра фудбал на Апенините и стана најдобриот голгетер од балканските простори во Серија А со 97 постигнати гола.
„Ќе се обидам да стигнам до „стотка“. Не се малку три гола во Серија А, но и има уште многу натпревари до крајот на сезоната“, вели Горан Пандев за МАКФУДБАЛ, два дена откако го урна Наполи на Џенаро Гатузо на „Луиџи Ферарис“.
Тој е икона во Македонија, успеа да ја одведе Македонија на Европското првенство, со погодок кој вечно ќе биде запишан во историјата. Ја урна Грузија и ја отвори европската врата за националниот тим.
„Тоа е мојот најголем успех во кариерата. Го остваривме сонот на сите генерации, но сега треба да размислуваме на добра презентација и на Европското првенство. Македонија може многу и на големиот турнир иако е аутсајдер во групата“, вели Пандев.
Гранде Мачедоне секогаш како да бил во втор план кога се во прашање напаѓачите од Балканот во Серија А. Ние Македонците одамна знаеме дека е бесмртен и се уште не веруваме дека некогаш и ќе се пензионира, а Горан Пандев на целиот Балкан му покажа дека е еден од најдобрите, поточно најдобар од просторите на екс – Југославија во Калчото. Две децении настапи, две децении на врвот, најдобар голгетер во Серија А од балканските простори.
