Македонскиот првак Струга Трим Лум е елиминиран на последната пречка пред пласманот во групната фаза од Конференциската лига. Исландскиот претставник Брејдаблик и во реваншот на Исланд славеше со 1-0, идентично како и во Охрид, и со вкупен резултат 2-0, ќе патува во групите од третото по ранг европско натпреварување.
Уште на почетокот, Брејдаблик преку Виктор Карл Еинарсон во третата минута поведе со 1-0, откако со прецизен удар од 15 метри го совлада Ќосевски.
Исландскиот тим ја зголеми предноста од првиот меч во Охрид, а Струга ТЛ немаше сили да возврати.
Бесарт Ибраими се обиде пред крајот на првиот дел, имаше неколку обиди Струга ТЛ и во вториот дел, но, сепак, не се снајде најдобро на теренот со вештачка трева на Исланд.
Сепак, Струга ТЛ може да се гордее со настапите на европска сцена оваа сезона, а сега ќе се фокусира на домашните натпреварувања.
