Македонскиот првак Струга Трим Лум утревечер (20 часот) го игра реванш натпреварот против Есперанж во третото квалификациско коло од Конференциската лига на УЕФА. Стружани имаат предност од 3-1 од првиот меч во Скопје, но тренерот Шпетим Дуро вели дека мора да размислуваат како да е 0-0.
„На овој натпревар доаѓаме со позитивен резултат, но ни остануваат уште 90 минути за игра. Мораме да ја заборавиме предноста и да играме како да е 0-0. Се надевам дека тимот ќе има уште еден добар настап во Европа, како што игравме добро на гости и против Жалгирис и против Будуќност. Веруваме дека утре домаќините ќе тргнат агресивно, тие нема што да загубат, а ќе сакаат да ја надоместат негативата. Сепак, ние сме подготвени за надигрување, имаме сила и тимски дух“, изјави Шпетим Дуро.
Буњамин Шабани истакнува дека тој и соиграчите се подготвени за максимална борба.
„Ќе мора да одработиме максимално, да трчаме многу и секако да ги исполниме задачите на стручниот штаб. Не е мала работа за Струга Трим Лум да обезбеди плеј-оф во Конференциската лига, сите сме насочени кон остварување на таа цел“, изјави Шабани.
