Капитенот на македонската фудбалска репрезентација, Горан Пандев, би сакал да се стави крај на фантастичната кариера по завршувањето на оваа сезона, пред преполни трибини на стадионот „Луиџи Ферарис“ во Џенова, каде ги мина последните пет сезони. Единствената идеја која се уште го премислува Горан Пандев е одложувањето на Европското првенство и огромната желба со Македонија да обезбеди учество на големото натпреварување. УЕФА поради пандемијата на коронавирусот неколку пати го одложи и терминот за плејофот во Лигата на нации и дуелот меѓу Македонија и Косово.
„Во моментов се уште планирам крај на кариерата после оваа сезона. Замислувам збогување со фудбалот пред многу луѓе на стадион, сакам да им се заблагодарам на сите во Џенова за петте прекрасни години тука. Дадов се од себе за овој дрес, сакам да кажам „збогум“ пред преполни трибини на „Луиџи Ферарис“, вели Горан Пандев за gianlucadimarzio.com.
