Вилјареал излезе со официјално соопштение дека нивниот крилен напаѓач Алехандро Баена поднел жалба до шпанската полиција против играчот од средниот ред на Реал Мадрид, Федерико Валверде, затоа што го удрил со тупаница во лицето по натпреварот меѓу двата тима.
„Фудбалерот на Вилјареал, Алекс Баена, беше нападнат додека се движеше кон тимскиот автобус по натпреварот против Реал Мадрид на „Сантијаго Бернабеу“. Соочен со оваа ситуација, играчот одлучи да поднесе соодветна жалба против напаѓачот до Националната полиција. Уште еднаш, Вилјареал отфрла какви било акти на насилство и цврсто верува во верзијата на својот играч, кого ќе го поддржува во текот на целиот процес“, се вели во соопштението на клубот.
Сепак, „Марка“ прецизира дека засега на Валверде не му се заканува спортска казна, бидејќи поднесена е пријава само до полиција, но не и до Дисциплинската комисија на Ла Лига.
