Наполи доживеа елиминација во осминафиналето на Купот на Италија. На домашен терен, „наполитанците“ испуштија предност од 2-1 во финишот од регуларниот дел, мечот отиде во продолженија каде имаа играч повеќе, но Кремонезе издржа се и на крајот славеше по изведување пенали со 4-5.
Кремонезе во четвртфиналето на Купот ќе се сретне со Рома.
Станислав Лоботка беше единствениот кој не успеа да реализира пенал во редовите на Наполи, а максимално успешни беа и фудбалерите на Кремонезе.
Во текот на мечот, Чарлс Пикел го доведе Кремонезе во водство во 18.минута, но Хуан Жесус и Џовани Симеоне направија пресврт до крајот на првото полувреме. Сепак, во 87.минута, Феликс Афена – Џан постигна израмнувачки погодок кој му овозможи на Кремонезе преку продолженија и пенали да направи голема сензација во Купот на Италија.
