Шкупи го победи Работнички, Струга само ремизираше против Скопје (ФОТО)

Актуелниот првак Шкупи го победи Работнички на стадионот „Борис Трајковски“ со 2-4 и ја намали негативата во однос на лидерот Струга ТЛ на само три бода, во пресрет на зимската пауза. Струга ТЛ ремизираше 1-1 на гости против Скопје на „Автокоманда“.

Академија Пандев продолжи со очајни игри и загуби дома од Тиквеш со 0-2, а Брегалница испушти два гола предност и на крајот ремизираше 2-2 против Победа.

Македонија ЃП го освои Кратово и го победи Силекс со 1-3.

Сандеј Адетунџи во седмата минута донесе водство за Шкупи, а потоа на Анес Рушевиќ му беше поништен регуларен погодок поради офсајд позиција. По ова, Сандеј Адетунџи стрелаше и вторпат, со во 40.минута Фати Исмаили си постигна автогол за 0-3 на полувремето за Шкупи. Методи Максимов со два гола, во 55. и во 63.минута, го врати Работнички во живот, но Кристијан Трапановски во 79.минута постигна четврти гол и го потврди триумфот на Шкупи.

Скопје и Струга ТЛ ремизираа 1-1 на „Автокоманда“. Христијан Малески донесе предност за стружани, но Скопје израмни од пенал со голот на Леонид Игнатов во 68.минута од мечот.

Македонија ЃП го победи Силекс на гости во Кратово со 1-3, а хет-трик постигна капитенот Филип Мишевски. Дефанзивецот се претвори во главен стрелец на „лавовите“ на овој дуел, додека за Силекс погоди Марјан Ристовски.

Брегалница и Победа одиграа 2-2 во Штип. Домаќинот поведе со двата гола на Дарко Додев во првиот дел, но Победа успеа да се врати и да освои бод со головите на Мазари и на Амос Губам.

Иван Ивановски и Андреј Лазаров беа стрелци на головите за Тиквеш во триумфот против Академија Пандев во Струмица.

ПРВА ЛИГА, 18.КОЛО – РЕЗУЛТАТИ

РАБОТНИЧКИ – ШКУПИ 2-4

СКОПЈЕ – СТРУГА ТЛ 1-1

АКАДЕМИЈА ПАНДЕВ – ТИКВЕШ 0-2

БРЕГАЛНИЦА – ПОБЕДА 2-2

СИЛЕКС – МАКЕДОНИЈА ЃП 1-3