Втора лига: Гостивар ја посакува есенската титула

Гостивар има план да го совлада Караорман и да го комплетира првиот дел од шампионатот на првата позиција. Со тоа избраниците на тренерот Октај Дерелиоглу би ја освоиле и есенската титула во Втората лига.

Вардар вчера го победи Кожуф во премиерата на ова 15.коло и во моментот има два бода предност на врвот. Но, доколку гостиварци слават над Караорман повторно ќе се вратат на првото место.

„Подготвени сме за надигрување и максимално мотивирани да ја оствариме целта. Веруваме во нашите квалитети и очекуваме триумф пред нашите гледачи. Секако, имаме максимален респект за Караорман и ќе треба на теренот да ги заслужиме трите бода“, вели дефанзивецот Стојан Стојчевски.

Воска Спорт на домашен терен има релативно лесна задача против Борец, а Детонит Плачковица гостува кај Слога Виница. Пелистер ќе оди на гости кај Каменица Саса, Беласица е домаќин на Охрид, додека Беса ќе го пречека тимот на Локомотива Пехчево. Тетекс ќе се сретне со Арсими.