Тренерот на Челси, Томас Тухел, беше бесен на своите играчи по поразот од Динамо Загреб со 1-0. Лошиот старт на сезоната за лондончани продолжи и во Лигата на шампионите. Тухел смета дека неговиот тим одиграл далеку под своите можности и има многу да работи.
„Настапивме под нашите можности, беше исто како и секогаш. Добро го започнавме натпреварот, но не ги реализиравме нашите шанси. Потоа ни дадоа премногу лесен гол во контранапад и од тој момент почнаа нашите тешкотии. Тие беа цврсти во дуелите. Јасно е дека сме во тежок момент“, смета Тухел.
Грешки имало и кај фудбалерите, но и кај стручниот штаб.
„Има многу што да се анализира. Морам и јас да ги видам моите грешки. Очигледно не играме како што треба. На мене е да го најдам решението. Во моментов ништо не оди како што треба. Се чини дека ја губиме самодовербата откако ќе примиме гол. Мораме да најдеме решение за овој проблем до нашиот следен натпревар“, додаде Германецот.
