На поранешниот играч на Челси, Алекс, му е извршена операција на срцето. 39-годишниот Бразилец ја заврши својата играчка кариера во 2016 година, а претходно играше за голем број европски тимови како ПСВ Ајндховен, Пари Сен Жермен и Милан.
Еден од поранешните клубови на дефанзивецот, бразилскиот Сантош, на социјалните мрежи објави видео порака од Алекс од неговата болничка соба, без да соопшти во која болница се наоѓа.
„Сакам да ги демантирам информациите дека имав срцев удар. Пред неколку дена ми беше дијагностициран здравствен проблем и лекарите решија да ме оперираат. Само што ја напуштив собата за интензивна нега и ќе останам во болница неколку дена“, изјави Алекс.
Бразилецот со клубовите во кои настапуваше има освоено национални титули во Бразил, како и во Холандија, Англија и во Франција. Во 2007 година со бразилската репрезентација ја освои Копа Америка, а во 2012 со тимот на Челси триумфираше во Лигата на шампионите.
