Претседателот на Украинската фудбалска федерација, Андреј Павелко поради војната во неговата земја не можеше да пристуствува на Конгресот на ФИФА во Доха, но, сепак, успеа да се обрати до колегите преку видео врска. Тој зборуваше облечен во панцир и му се заблагодари на фудбалскиот свет за помошта и за поддршката што ја даваат за Украина.
„За жал не можам да бидам со вас затоа што повеќе од еден месец ја браниме нашата земја од агресијата на Русија. Фудбалот е во втор план затоа што луѓе секојдневно гинат. Јас сум благодарен за фудбалската помош на Украина, луѓето од фудбалот и организациите се тука за нас, благодарам за сите хуманитарни акции, Украина ви е благодарна! Благодарност и до првиот човек на УЕФА, Александер Чеферин кој организираше група за помош на украинскуте фудбалери. Со нас е вистината, ќе го победиме агресорот и ќе го заборавиме овој хорор. Ние не сакаме борби на улици со оружје, сакаме борба на стадионите, во спортски дух и ферплеј“, изјави Андреј Павелко по што доби аплауз од присутните на конгресот.
Поради инвазијата на Украина, и ФИФА и УЕФА ја суспендираа Русија и националните тимови и клубовите од земјата немаат право на настап во меѓународните натпреварувања.
