Палермо ќе биде мегданот каде Италија и Македонија ќе го играат полуфиналниот бараж натпревар за пласман на Светското првенство. На 24 март, избраниците на Благоја Милевски ќе го предизвикаат актуелниот европски првак, а за Александар Трајковски тоа ќе биде и своевидно „враќање дома“, со оглед дека заедно со Илија Несторовски во минатото го носеа дресот на Палермо.
Во интервју за „Тутомеркатовеб“, тој вели дека Македонија никогаш не се предава иако против себе ќе има голем ривал.
„За мене тоа ќе биде емотивно враќање. Но, секако ќе биде и голем натпревар, како за мене така и за Македонија. Ова е за нас неверојатна шанса, да се бориме за пласман на Светско првенство, да направиме уште една историја и бидете сигурни дека ќе сториме се да ја оствариме целта. Македонија никогаш не се предава, така ќе биде и во Палермо. Ќе ни недостига многу квалитетот и искуството на Горан Пандев, но тој се откажа од националниот тим и сега е време да блеснат неговите наследници“, изјави Александар Трајковски, кој сега е член на данскиот Алборг.
