Контроверзниот италијански напаѓач Марио Балотели би можел да се врати во Премиер – лигата оваа зима. 31-годишниот поранешен репрезентативец на „аѕурите“ е цел на англискиот Њукасл.
„Супер Марио“ моментно е член на турскиот Адана Демирспор, а неговиот договор е до летото 2024 година.
Балотели има големо искуство на Островот. Има играно за клубови како Ливерпул и Манчестер Сити. Њукасл неодамна ја промени сопственоста и има големи финансиски средства, но резултатите на теренот не се добри, бидејќи „чавките“ се претпоследни на табелата со 12 бода. Ова го принудува раководството да бара нови засилувања во овој зимски преоден рок.
